Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

La Societad svizra da radio e televisiun SSR – ina part da la varietad da medias svizra

La SSR è ina part da la plazza da medias Svizra. Quai che capita là reguarda tuts, perquai ch'ina purschida da medias independenta e variada è impurtanta per che la democrazia funcziunia. 

Ni la furmaziun, ni la cuntinuitad da la dimensiun necessaria da la purschida da medias na capitan però automaticamain. Per quest motiv vegnan sustegnids en Svizra – sper la SSR – 21 emetturs da radio privats e 13 staziuns da televisiun privatas cun circa 67,5 milliuns entradas da taxas (stadi dal 2016). Gasettas vegnan subvenziunadas en Svizra indirectamain cun daners statals, per exempel cun servetschs da distribuziun da la posta reducids. Spezialmain gasettas vegnan pli e pli sut pressiun pervia da l'internet sco funtauna d'infurmaziuns gratuita. Il dumber da titels da gasetta è dapi onns regressiv.

En quest champ da tensiuns sto la SSR procurar precautamain che la varietad da medias en Svizra vegnia mantegnida er en l'avegnir – er or d'agen interess.