Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

Quai che capita sin la plazza da medias Svizra reguarda nus tuts.

Ina plazza da medias varianta è ina pitga impurtanta da la democrazia. La plazza da medias Svizra è en in midament.

Per ch'ina democrazia funcziunia, è ina purschida da medias independenta e varianta fitg impurtanta (guardar er Incumbensa e dretg) per che las burgaisas ed ils burgais possian far in'atgna idea davart il svilup politic, economic e social. L'idea generala dal service public en la domena da las medias gioga ina rolla impurtanta per ina varietad da medias viventa.

Questa dimensiun necessaria da la purschidas da medias na sa furma e n'exista betg simplamain uschia. Il stadi sto il cuntrari avair quità per che la varietad da medias saja garantida. Oz metta l'internet sut squitsch gasettas che custan cun sias numerusas funtaunas d'infurmaziun gratuitas e betg liadas ad in cunfin linguistic u naziunal. Quai ha per consequenza ch'il dumber da titels da gasettas da la Svizra sa diminuescha dapi in pèr onns. Chasas edituras pli pitschnas datti pli e pli pauc. Chasas edituras grondas daventan pli e pli grondas e rimnan sut lur tetg adina dapli gasettas, ma er emetturs da radio e televisiun privats.

En Svizra sustegn'ins era purschiders da radio e televisiun privats cun daners da las entradas da taxas, premess ch'els han ina concessiun e respectan tschertas finamiras definidas dal Cussegl federal – quasi sco cuntraprestaziun. Circa quatter pertschient da las entradas da taxas, oz circa 54 milliuns francs, van a 22 staziuns da radio e 13 staziuns da televisiun privatas (stadi dal 2015).

L'impurtanza da l'internet che crescha ad in crescher sa mussa era cun il fatg che las burgaisas ed ils burgais tschertgan lur infurmaziuns adina pli savens en l'internet ed adina pli darar en las medias stampadas, al radio u a la televisiun. E gist en l'internet èn las libertads publicisticas da la SSR limitadas. La SSR sto surtut resguardar prescripziuns strictas areguard la lunghezza da las contribuziuns dals texts online. Il motiv è che gasettas existan oravant tut da texts. Era las gasettas han constatà ch'il public è oz en l'internet. Ellas emprovan pia da sa posiziunar en l'internet cun novs models da fatschenta. Sch'era la SSR ch'è finanziada cun taxas mettess en l'internet texts fitg cultivads, temessan las gasettas in dischavantatg.

I dat pajais, nua ch'era las gasettas survegnan daners dal stadi. Per quai ston ellas però ademplir tschertas premissas. En Svizra survegnan las gasettas in sustegn indirect dal stadi: la Confederaziun procura per ina distribuziun reducida da gasettas e revistas tras la Posta grazia a subvenziuns. La Svizra n'enconuscha betg ina promoziun da pressa directa. Gasettas svizras vegnan finanziadas bunamain mo cun las entradas commerzialas da lur chasas edituras, p.ex. cun inserats.

E co vesa ora la plazza da medias Svizra en l'avegnir? Davart questa dumonda na pondereschan betg mo la SSR ed autras chasas da medias, mabain era politicras e politichers. In'autra dumonda è co che l'incumbensa dal service public da la SSR vesa or en l'avegnir e co che svilups socials sa reflecteschan en l'incumbensa da la SSR da damaun.