Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

Per quels che vulan savair precis

L'incumbensa legala e giuridic-concessiunala da la SSR

  • La lescha e la concessiun dumondan otg aspects en la purschida da la SSR

    Tge aspects tematics sto la SSR represchentar generalmain en sia purschida?

    • Spiert da cuminanza da la Svizra
      (p.ex. rapportar tge che capita en las autras regiuns linguisticas)
    • Integraziun
      (dad estras ed esters e da persunas cun impediments dals senns, p.ex. cun suttitels u cun emissiuns describidas audio)
    • Promoziun da la democrazia
      (cun segirar la furmaziun d'opiniun libra davart temas da politica, economia e societad. Conflicts, debattas politicas u temas da la votaziun ston adina vegnir sclerids da differentas varts ed elavurads adequatamain)
    • Promoziun da la lavur culturala svizra
      (surtut en las branschas film, musica e litteratura, p.ex. cun la cunvegna «Pacte de l'audiovisuel» cun la branscha da film)
    • Furmaziun
    • Divertiment
    • Incumbensa a l'exteriur
      (collavuraziun cun ils dus organisaturs da televisiun internaziunals TV5Monde e 3sat e duas purschidas per l'internet cun SWI e tvsvizzera.it)

    Konzession SRG SSR

  • Tge dumonda la concessiun en chaussas da la qualitad da la SSR?

    En la concessiun da la SSR hai num: 

    1. La creaziun da programs da la SSR sto ademplir autas pretensiuns qualitativas ed eticas. Las singulas branschas da programs s'orienteschan a l'incumbensa da programs e sa distinguan causa la credibladad, il senn da responsabladad, la relevanza e la professiunalitad schurnalistica. La SSR procura che ses programs sajan incumparabels e sa distingua uschia dals organisaturs che sa drizzan al commerzi.
    2. La SSR ha en mira in'auta acceptanza dals differents publics da finamira. Ella na mesira l'acceptanza betg en emprima lingia cun quotas da participaziun al martgà.
    3. Ella definescha standards da qualitad da cuntegn e da furma per pudair realisar las finamiras da las alineas 1 e 2. Ella publitgescha quests standards, realisescha regularmain controllas da qualitad internas ed infurmescha la populaziun davart ils resultats.

    Funtauna: concessiun SSR, art. 3

    Konzession SRG SSR

  • Tge dumonda la concessiun en chaussas da la diffusiun da la purschida da la SSR?

    Sche la SSR vul p.ex. realisar in nov program da televisiun u da radio, dastga ella far quai mo, sch'il Cussegl federal decida in midament correspundent da la concessiun. La concessiun definescha pia precisamain, en tge regiun linguistica che tge programs da radio e televisiun vegnan emess e cun tge tecnologia: DAB+, UUC, DVB-T u satellit per menziunar mo in pèr. Sche la SSR vul manar a fin ina purschida, po ella far quai mo cun il consentiment dal Cussegl federal ad in midament correspundent da la concessiun. Ils artitgels 4 fin 11 da la concessiun tractan temas davart il cuntegn e la diffusiun.

    Konzession SRG SSR

  • Pertge pretendan la lescha e la concessiun da la SSR da collavurar cun terzs?

    La SSR è in'impurtanta producenta da cuntegns audiovisuals en Svizra. Pervia da l'entrada da taxas dispona ella d'avunda meds per pudair agir sco monopol per exempel en la branscha da films. Quai pudess avair dischavantatgs per commembers da la branscha pli pitschens. La lescha e la concessiun prevesan perquai mesiras da protecziun cunter l'abus da la posiziun da monopol e per mantegnair la diversitad da l'opiniun e da la purschida er ordaifer resp. sper la SSR. La SSR è pia obligada da collavurar cun la branscha da films svizra, cun l'industria audiovisuala, cun la branscha da musica svizra, cun auters organisaturs svizzers, cun archivs da medias naziunals e sche pussaivel cun partenaris da programs internaziunals. Cun la branscha da films exista per exempel ina cunvegna che prevesa che la SSR investeschia circa 27,5 milliuns francs l'onn en coproducziuns (Pacte de l'audiovisuel). La SSR vala sper la Confederaziun sco ina da las pli impurtantas pitgas da la promoziun dal film svizra. Per pudair promover intenziunadamain la branscha da musica svizra han ins suttascrit la charta da musica svizra. La SSR s'oblighescha da transmetter ina tscherta part musica svizra l'onn.

    Ils artitgels 15 fin 21 da la concessiun reglan la collavuraziun cun auters partenaris.

    Partizipaziuns SSR

    Cooperaziun SSR

    Konzession SRG SSR

  • Tge dastga la SSR en il sectur da las purschidas online, tge betg?

    Cuntegns audio e cuntegns audiovisuals èn il punct central da la purschida online da la SSR. La concessiun permetta a la SSR da metter en l'internet purschidas audio e videos (on-demand) ch'èn destinads mo per l'internet u en emprima lingia per l'internet. Purschidas che na ston pia betg l'emprim vegnir emessas al radio u a la televisiun. Il livestream vegn dentant reglà en l'art. 9: en ils secturs da la politica, dal sport, da l'economia e da la cultura po la SSR emetter live en l'internet events da terzs, tant enavant che quels èn d'impurtanza naziunala u linguistic-regiunala. 

    En connex cun contribuziuns da texts ston ins far attenziun:
    -  75 pertschient da tut ils texts ston esser colliads cun material audiovisual.
     - contribuziuns da text che n'han nagina relaziun cun in'emissiun na dastgan – per protecziun da las medias stampadas – betg surpassar 1000 segns en las rubricas novitads, sport e regiunal/local. Er en connex cun colliaziuns ston ins esser fitg attent: ins po mo inditgar colliaziuns, sche criteris redacziunals giustifitgeschan quai. Colliaziuns commerzialas n'èn betg permessas.

    Ina posiziun particulara ha il servetsch online da SWI: per sustegnair il contact da las Svizras e dals Svizzers a l'exteriur cun lur patria e promover la preschientscha da la Svizra e la chapientscha per ses intents, gestiunescha SWI tranter auter ina purschida d'internet multimediala e plurilingua per la SSR tenor ina cunvegna da prestaziuns cun la Confederaziun.

    Igl è impurtant che las prescripziuns da qualitad per radio e televisiun valan era per l'internet.

    Il tema online vegn tractà en il chapitel 13 da la concessiun. 

    Konzession SRG SSR

  • Tge capita, sche la SSR vul far insatge che na stat betg en la concessiun?

    Il Cussegl federal dat a la SSR ina concessiun limitada che precisescha l'incumbensa da la SSR en pli per la durada. La SSR dastga sut tschertas cundiziuns era realisar activitads che n'èn betg regladas en la concessiun. Ella sto però surpigliar sezza ils custs che stattan en connex cun quella lavur ed als preschentar separadamain en ils cudeschs da fatschenta.

    Questas activitads ordaifer la concessiun na dastgan betg influenzar la realisaziun da l'incumbensa da program. Las pussaivladads da svilup d'autras intrapraisas da medias na dastgan en pli betg vegnir restrenschidas considerablamain pervia da talas activitads. Cura che la posiziun u las incumbensas d'autras interpraisas da medias svizras vegnan influenzadas, sto quai vegnir communitgà a l'Ufcom avant che cumenzar l'activitad.

    Konzession SRG SSR

  • Da tge princips organisatorics sto la SSR disponer?

    La Lescha federala davart radio e televisiun (LRTV) definescha ensemen cun l'ordinaziun respectiva e cun la concessiun ils princips da l'organisaziun e da la finanziaziun da la SSR: la SSR sto s'orientar al dretg da la societad anonima. Ils organs principals èn la radunanza generala (tar la SSR ha ella num radunanza da delegads), il cussegl d'administraziun, il post da revisiun e la direcziun. La SSR sa finanziescha principalmain cun las taxas da recepziun. Il Cussegl federal fixescha l'autezza da la taxa da recepziun. Cun las taxas na vegn betg mo finanziada la SSR, mabain era pajadas autras intrapraisas da radio cun in'incumbensa da prestaziun, il post d'incassament da taxas (Billag, la filiala da la Swisscom) e la fundaziun per la perscrutaziun d'utilisaziun (Mediapluse). Per la surveglianza da finanzas è responsabel il Departament federal per ambient, traffic energia e communicaziun (Datec).

    Bundesgesetz über Radio und Fernsehen (RTVG)

  • Tge rolla gioga la SRR en cas da crisas e privels?

    En cas da grondas crisas – e mo lura – è la SSR l'organ d'infurmaziuns uffizial dal Cussegl federal. Cunvegnas da prestaziun spezialas cun l'Agentura telegrafica svizra (ATS) e la SSR garanteschan ch'il Cussegl federal po sa drizzar da tut temp a la populaziun. Sche instrucziuns da cumportament concretas a la populaziun èn necessarias, pon las autoritads instradar in'annunzia d'alarm sur il sistem d'infurmaziuns Information Catastrophe Alarme Radio Organisation (Icaro). En quest cas gioga il radio sco pli spert med ina rolla impurtanta: la SSR interrumpa ses programs da radio per annunzias impurtantas sch'i dat in alarm da signal general. La SSR prenda en pli mesiras per emetter in program da radio da privel, perfin sche la rait d'emissiun regulara è interrutta.
    Tut questas prestaziuns èn fixadas en cunvegnas da prestaziun particularas e vegnan realisadas mo en situaziuns da crisas e da privels.

    Funtauna
    Informaziun SSR

Indicaziuns giuridicas betg mo per giurists: la SSR e sia integraziun giuridica

  • Tge collia la SSR cun la Constituziun federala?

    La Constituziun federala (Cst) stat sin il pli aut nivel dal sistem giuridic svizzer. Tut las ordinaziuns e tut ils decrets da la Confederaziun, las constituziuns, las leschas, las ordinaziuns ed ils decrets dals chantuns e da las vischnancas èn suttamess ad ella. Per chasas da medias èn surtut impurtants ils artitgels 17 e 93 Cst. Quels garanteschan l'independenza da radio e televisiun e defineschan era las valurs directivas che la Confederaziun sto resguardar cun concepir in sistem da medias. Resumà èn quai las suandantas valurs:

    Il radio e la televisiun:

    • contribueschan a la furmaziun ed al svilup cultural, a la furmaziun d'opiniun libra ed al divertiment
    • resguardan las particularitads dal pajais ed ils basegns dals chantuns
    • represchentan correctamain ils eveniments ed expriman adattadamain la diversitad dals aspects

    Il radio e la televisiun ston pia contribuir a la furmaziun d'opiniun libra. Quella vegn considerada sco premissa centrala per garantir ina democrazia. Il public na dastga betg vegnir manipulà. El sto pudair far sez in maletg sin basa da las infurmaziuns intermediadas. Per quest motiv ston per exempel opiniuns en in'emissiun vegnir decleradas sco talas. En pli ston ins resguardar avant elecziuns e votaziuns surtut il mantegniment da l'egualitad da schanzas da partidas u persunas.  

    En pli cuntegna la Cst dretgs fundamentals che pon esser relevants en connex cun il radio e la televisiun, sco per exempel la libertad d'opiniun, d'infurmaziuns da las medias, da lingua e d'art. 

    Constituziun federala

  • Tge è la lescha federala per il radio e la televisiun?

    La Lescha federala davart radio e televisiun (LRTV) vala per tut ils organisaturs da radio e televisiun en Svizra e reglescha l'organisaziun, l'elavuraziun, la diffusiun e la recepziun da programs da radio e televisiun. Il medem mument è ella la basa per dar la concessiun a la SSR. La LRTV è pia la pli impurtanta ovra directiva per la SSR. Sco tut las leschas vegn era la LRTV decretada dal parlament.
    (Detagls: guardar survart «L'incumbensa legala e concessiv-giuridica da la SSR»).

    Bundesgesetz über Radio und Fernsehen (RTVG)

  • Tge è ina concessiun?

    Ina concessiun è ina permissiun uffiziala limitada. La concessiun da la SSR deriva da la Lescha davart radio e televisiun (LRTV). Ella na vegn però betg decretada dal parlament sco las leschas, mabain dal Cussegl federal. Tut ils organisaturs da radio e televisiun svizzers che vulan profitar dals daners da las entradas da taxas, basegnan ina concessiun. Quella impona ad els tschertas prescripziuns – sco cuntramesira a la finanziaziun tras las taxas. La SSR vegn per gronda part finanziada tras las entradas da taxas ed ha pia ina concessiun. Entant che la LRTV vala per tut ils organisaturs, è la concessiun individualisada per la SSR: ina sort «formular d'empustaziun» a la SSR. Il Cussegl federal emetta la concessiun mintgamai per la durada da diesch onns (guardar survart «L'incumbensa legala e concessiv-giuridica da la SSR»).

  • Pertge è il dretg internaziunal impurtant per la SSR?

    Cun far cunvegnas internaziunalas pon stadis s'obligar da decretar tschertas regulaziuns en lur dretg naziunal. En la domena dal radio e da la televisiun pon las suandantas cunvegnas che la Svizra ha fatg vegnir numnadas sco las trais pli impurtantas:  

    • la Convenziun per la protecziun dals dretgs umans e da las libertads fundamentalas (Cedu) dals 4 da november 1950 dals stadis commembers dal Cussegl da l'Europa (SR 0.101). En quella convenziun segireschan tut ils stadis participants a las persunas che suttastattan a la pussanza da suveranitad ils dretgs umans numnads en la convenziun, sco per exempel la libertad d'opiniun.
    • la Cunvegna europeica davart la televisiun sur cunfins dals stadis participants dal Cussegl da l'Europa e d'auters stadis dal contract da la cunvegna culturala europeica dals 5 da matg 1989. Là èsi per exempel definì che l'emissiun d'in program na possia cuntegnair nagina pornografia u instigar a rassissem. En pli è scumandada la reclama per products da tubac. 
    • Cunvegna tranter la Confederaziun svizra e la Communitad europeica en la domena audiovisuala dals 11 d'october 2007 per definir las premissas e las cundiziuns per la participaziun da la Confederaziun svizra al program communabel «Media 2007». «Media» è in program da promoziun per il sectur audiovisual europeic. Sco cuntramesira al program da promoziun sto la Svizra surpigliar tschertas regulaziuns da basa dal reglament da medias da l'UE.

    Europäisches Übereinkommen über das grenzüberschreitende Fernsehen

  • Tge capita, sche la SSR surpassa las disposiziuns?

    L'Uffizi federal da communicaziun (Ufcom) controlla, sch'il dretg svizzer ed il dretg internaziunal vegnan observads. Sch'el constatescha in surpassament dal dretg, po el per exempel pretender da curreger questa mancanza. En tscherts cas po el er ordinar sancziuns administrativas. Sche la SSR surpassas grevamain per exempel disposiziuns da la concessiun, pudess l'Ufcom la sancziunar cun in import da fin a diesch pertschient da la svieuta annuala gudagnada ils ultims trais onns da gestiun en media en Svizra.

    Recurs cunter disposiziuns da l'Ufcom pon ins far al Tribunal administrativ federal a Son Gagl ed al Tribunal federal a Losanna. La decisiun dal Tribunal federal a Losanna è da princip definitiva. Sch'i vegn fatg valair in surpassament dals dretgs fundamentals da la Cedu, po la Svizra u ina persuna natirala u giuridica pertutgada recurrer sco ultima pussaivladad entaifer sis mais tar il Tribunal europeic dals dretgs umans (Tedu) a Strasbourg (grafica 1).

    Surpassament da las disposiziuns davart il cuntegn d'emissiuns redacziunalas

    Entaifer 20 dis suenter che in'emissiun è vegnida transmessa u sche l'access ad in program d'in organisatur svizzer vegn refusà, po mintgin sa drizzar ad in servetsch da mediaziun. Quel n'è betg autorisà da decider u da dar directivas. El emprova plitost d'intermediar tranter ils participants.

    Tgi che n'è betg d'accord cun il rapport final dal servetsch da mediaziun, po recurrer entaifer 30 dis tar l'Autoritad independenta da recurs (AIRR). L'AIRR s'occupa dal recurs, sch'ina relaziun stretga cun il tema exista u sch'il recurs vegn inoltrà cun almain 20 suttascripziuns. Ella po era s'occupar dad el, sch'il public ha interess per la decisiun.

    Cunter la decisiun da l'AIRR pon ins recurrer directamain tar il Tribunal federal. La decisiun da quel è per princip definitiva. Sch'i vegn però fatg valair in surpassament dals dretgs fundamentals da la Cedu, po la Svizra u ina persuna natirala u giuridica pertutgada recurrer entaifer sis mais tar il Tribunal europeic dals dretgs umans (Tedu) a Strasbourg (grafica 2).

    Grafica 1

    Grafica 2
  • Pertge è il dretg d'autur fitg impurtant per la SSR?

    Per tut las interpresas da medias è il dretg d'autur fitg impurtant, perquai che l'activitad economica d'in organisatur da radio (sco da mintga interpresa da medias) è quella d'acquistar ils dretgs dad ovras protegidas tenor ils dretgs d'autur e da las utilisar lura per las medias. Ils dretgs d'autur èn quasi la materia prima per producir emissiuns. La gronda part da quels acquista la SSR tar las lavurantas ed ils lavurants. Quels surlaschan ils dretgs a lur patruna tenor las disposiziuns dal Dretg d'obligaziuns, dal contract collectiv da lavur (CCL) e dal contract individual da lavur (CIL). Per l'utilisaziun commerziala per in auter intent da radio vegnan els indemnisads cun ina pauschala («fond creativ»). La SSR è la pli gronda utilisadra d'ovras existentas en Svizra, ella acquista ils dretgs correspundents surtut tar las societads da gestiun collectiva (Suisa, SSA, Pro Litteris, Suissimage e Swissperform). Ulteriurs dretgs acquista ella directamain tar ils possessurs, per exempel tar distributurs da films.

    Il dretg d'autur reglescha er ils uschenumnads dretgs da protecziun (p.ex. dretgs vi d'emissiuns, dretgs da protecziun). La SSR è orginarmain la possessura da tals dretgs sco interprendidra d'emissiuns e producenta. La posiziun dal dretg è surtut impurtanta en la relaziun economica cun ils interprendiders da rediffusurs (gestiunaris da raits da cabels).

    Basas legalas SSR