Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

La SSR – independenta, en tut la Svizra ed a favur da la societad

Savens vegn la SSR entitulada sco «radio dal stadi» u «televisiun dal stadi». Nungiustifitgà.

La SSR ademplescha in'incumbensa sociala sin basa da la constituziun, da la lescha e da la concessiun e survegn per quella daners da la taxa da radio e televisiun. Quella taxa vegn incassada da la Billag per l'incumbensa da la Confederaziun. Tge incumbensas che la SSR ha d'ademplir en il rom da sia incumbensa regleschan la Lescha federala davart radio e televisiun (LRTV) e – detagliadamain – l'ordinaziun correspundenta e la concessiun:

  • purschidas davart tscherts aspects en il program (furmaziun da l'opiniun libra, spiert da cuminanza tranter las parts dal pajais, cultura svizra, furmaziun, integraziun e divertiment)
  • in volumen sumegliant da purschidas en las trais grondas regiuns linguisticas, ina purschida adattada era per la Svizra rumantscha, ina purschida online per las Svizras ed ils Svizzers a l'exteriur
  • diffusiun sur differents chanals (p.ex. UUC, DAB+, DVB-T)
  • ina purschida en l'internet che correspunda a las prescripziuns (p.ex. restricziun da contribuziuns da text senza rapport ad in'emissiun da radio u da televisiun)
  • ina structura organisatorica che correspunda a las premissas (p.ex. cumposiziun dal cussegl d'administraziun)
  • ina collavuraziun cun tschertas branschas (film, musica, archivs, etc.)

La SSR sto en pli ademplir pretensiuns spezialas da la qualitad e da l'etica en ses programs per sa distinguer dals purschiders commerzials.

Las activitads, l'organisaziun e la finanziaziun da la SSR vegnan principalmain definidas da la Confederaziun e survegliadas da l'Uffizi federal da communicaziun (Ufcom). La SSR na po pia betg agir libramain. En il rom che la lescha e la concessiun furman è ella però independenta. Questa ordinaziun da l'independenza da radio e televisiun è fixada en la Constituziun federala. Nagin, era betg deputads da la politica u da l'administraziun federala, na po intervegnir en la lavur redacziunala da las medias ed uschia er en la lavur redacziunala da la SSR.

Fauss è:
La SSR e sias unitads d'interpresa RSI, RTR, RTS, SRF e SWI èn «radios dal stadi», «televisiuns dal stadi» u «in'interpresa dal stadi».

Correct è:
La SSR è ina societad privata manada tenor il dretg da la societad anonima (vesair era «Structura ed organisaziun») cun in'incumbensa sociala particulara (concessiun). Ella gestiunescha in'interpresa da medias per ademplir questa incumbensa.

Savevas gia?

Il «model dals quatter rintgs» da la Confederaziun illustrescha fitg bain la relaziun tranter la Confederaziun e la SSR. L'administraziun federala maina ses furniturs da prestaziun da maniera fitg differenta. Tschertins maina ella da moda severa e centrala, auters survegnan finamiras e pon uschiglio lavurar libramain. La SSR n'è betg in element dal model dals quatter rintgs. Ella è cumplettamain ordaifer quel.

  • Rintg 1: administraziun miniseriala
    Primarmain posts d'administraziun cun funcziuns da coordinaziun e da direcziun, p.ex. l'Uffizi federal da giustia.
  • Rintg 2: uffizis manads cun mandats da prestaziun
    Furniturs da prestaziun entaifer l'administraziun, p.ex. l’Ufcom.
  • Rintg 3: manaschis ed instituts dal dretg public
    Furniturs da prestaziun ordaifer l'administraziun, però plainamain en possess da la Confederaziun, p.ex. la Scola politecnica federala (SPF)
  • Rintg 4: interpraisas privatas e d'economia maschadada
    Furniturs da prestaziun ordaifer l'administraziun cun participaziun federala, però betg cumplaina, p.ex. la Posta, la Swisscom.
  • SSR: nagin element dal model da quatter rintgs da la Confederaziun, essend anc pli distanzià da la Confederaziun
    Societad manada tenor il dretg da la societad anonima cun in'incumbensa sociala.

Savevas gia?

«L'idea dal service public» è directiva per la SSR. Questa idea dal service public dal radio è sa furmada en l'Europa, l'emprim en Gronda Britannia, tranter las duas guerras mundialas. Cun l'extensiun dal radio han ins spert badà ch'il radio gioga ina rolla impurtanta areguard la furmaziun da l'opiniun da la populaziun. Il radio è daventà in instrument da pussanza. A tgi appartegna però quest radio? A la regenza? A l'economia? La Gronda Britannia è sa decidida per in institut da radio che duai esser independent dals interess politics ed economics. L'institut da radio duai exister mo a favur da la societad. Quai è stà il cumenzament dal BBC resp. dal service public.

Co che la noziun service public implitgescha, sa tracti d'in servetsch public – qua specificamain – d'in servetsch public dal radio. Trais puncts èn centrals:

  1. Nus cuntanschain tuts.
    Tut la populaziun – er en regiuns perifericas – ha access a la purschida dal cuntegn da gronda qualitad da la SSR. Il volumen da la purschida per las trais grondas regiuns linguisticas è perquai sumegliant grond. Era la Svizra rumantscha ha in'atgna purschida pli pitschna da radio, televisiun e web.
  2. Nus represchentain la diversitad d'opiniun.
    Nus mussain adina plirs aspects d'in tema ed essan nunpartischants. Il public po pia adina crear ses agen maletg e sia atgna opiniun. Surtut en ina democrazia cun ina populaziun che po participar fundamentalmain a la decisiun è quai fitg impurtant.
  3. Nus essan independents.
    Nossa activitad è independenta dals interess politics ed economics. Nus n'avain en mira nagin profit. Nus servin mo a la societad.