Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

Directivas tar RSI, RTR, RTS, SRF e SWI

Radiotelevisione svizzera (RSI)

RSI è l'unitad d'interpresa da la SSR en la Svizra taliana. 1155 collavuraturs (1039 plazzas da lavur a temp cumplain) produceschan cuntegns per trais programs da radio, dus programs da televisiun e diversas purschidas da multimedia.

  • «Incumbensa e dretg» – directivas da RSI

    Las basas legalas, l'incumbensa da service public, las valurs, la purschida da programs: las directivas, tenor las qualas RSI agescha, èn resumadas sin in pèr paginas:

    Linee guida RSI

Radiotelevisiun Svizra Rumantscha (RTR)

RTR è in'unitad d'interpresa da la SSR cun il studio principal a Cuira. En 131 plazzas cumplainas lavuran 167 persunas en tut la Svizra rumantscha per noss public.

  • «Incumbensa e strategia» - directivas da RTR

    RTR ha l'incumbensa da garantir il service public audiovisual per la Svizra rumantscha. Las activitads da RTR sa basan sin la Constituziun federala, sin la Lescha federala davart radio e televisiun (LRTV), sin l'Ordinaziun davart radio e televisiun (ORTV), sin la concessiun da la SSR e sin ils statuts da SRG.R. Tge che quai vul dir concretamain pon ins leger en il Mussavia RTR.

    Incumbensa e strategia

Radio Télévision Suisse (RTS)

RTS porscha cuntegns sin quatter programs da radio, dus programs da televisiun e pliras plattafurmas interactivas. RTS sa drizza al public francofon en Svizra e sur TV5Monde ed il web a persunas da lingua franzosa a l'exteriur. Cun 1872 plazzas da lavur (1568 plazzas da lavur a temp cumplaina) è l'interpresa domiciliada a Genevra e Losanna in dals leaders sin il martgà en la domena audiovisuala.

  • Incumbensa

  • Las finamiras

  • Missiun

  • La strategia da RTS

    La strategia preschenta las valurs da la RTS, med audiovisual svizzer dal service public ed actura da la diversitad romanda ch'è averta al mund. Ella descriva las finamiras che la RTS vul realisar ils proxims onns en las domenas da la producziun radio-televisiun-multimedia e da la direcziun da l'interpresa.

    Stratégie RTS 2017–2018

  • Cooperaziuns

Schweizer Radio und Fernsehen (SRF)

SRF cun il studio principal a Turitg Leutschenbach è la pli gronda unitad d'interpresa da la SSR. Cun ulteriurs studios principals a Basilea, Berna e Turitg Brunnenhof e studios regiunals ad Aarau, Cuira, Lucerna e Son Gagl è SRF represchentà bain en la Svizra tudestga. Circa 2100 collavuraturas e collavuraturs lavuran tar SRF.

  • «Incumbensa e dretg»: directivas da SRF

    Il chapitel «Incumbensa e strategia» sin srf.ch resumescha las prestaziuns variadas da SRF en il senn dal service public e cuntegna colliaziuns directas a las basas legalas correspundentas.

    Auftrag und Strategie SRF

Swissinfo (SWI)

swissinfo.ch ademplescha dapi passa diesch onns l'incumbensa d'infurmaziun a l'exteriur dada da la Confederaziun e cumplettescha uschia ina purschida online da las staziuns da radio e televisiun da la SSR. Il servetsch internaziunal da la SSR sa drizza oz en emprima lingia ad in public internaziunal interessà per la Svizra sco er a las Svizras ed als Svizzers a l'exteriur.

Dapi il 2013 rapporta swissinfo.ch er en russ – ultra d'englais, tudestg, franzos, talian, spagnol, portugais, chinais, arab e giapunais – e cuntanscha uschia passa 80% dals utilisaders da l'internet en tut il mund.
swissinfo.ch ha ina sedia a Berna (sez principal), a Genevra ed a Turitg. Ulteriuras plazzas da lavur sa chattan en il center da medias da la Chasa federala.