Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

La SSR en in'egliada

  • Structura generala – Interpresa sco Uniun

    Societads affiliadas: Technology and Production Center Switzerland AG SWISS TXT AG Telvetia SA Direcziun generala swissinfo.ch Schweizer Radio und Fernsehen Radio Télévision Suisse Radiotelevisiun Svizra Rumantscha Radiotelevisione svizzera Comité directiv Directur general Regionalrat, Regionalvorstand, SRG.D, Publikumsrat, Ombudsstelle Conseil régional, Comité régional, RTSR, Conseil du public, Organe de médiation Radunanza generala, Cussegl regiunal, Suprastanza , SRG.R, Cussegl dal public, Organ da mediaziun Assemblea generale dei soci, Consiglio regionale, Comitato, CORSI, Consiglio del pubblico, Mediatore Radunanza da delegads Cussegl d'administraziun Revisiun interna Uniun SRG SSR Interpresa SRG SSR
  • Tge finamira ha la societad SSR?

    La societad SSR organisescha purschidas audiovisualas dal service public tenor la Lescha da radio e televisiun (LRTV) e tenor la concessiun dal Cussegl federal. Ella consista da quatter societads regiunalas: SRG.D, RTSR, Corsi e SRG.R. Quellas sa cumponan anc ina giada da societads commembras, p.ex. Argovia/Soloturn, Svizra da l'Ost, Giura. Da quellas sa sutdividan insaquantas.

    Per cuntanscher sia finamira maina la societad in'interpresa cun las tschintg unitads d'interpresa RSI, RTR, RTS, SRF, SWI (purschida a l'exteriur) e cun las societads affiliadas (Technology and Production Center Switzerland AG, SWISS TXT AG, Telvetia SA e Mxlab AG).

  • Tge fan ils commembers da la societad SSR?

    La societad deleghescha l'interpresa professiunala SSR da cuntanscher la finamira da la societad (guardar «Finamira da la societad SSR»), numnadamain da realisar purschidas audiovisualas. Las quatter societads regiunalas rinforzan la SSR en la societad, animeschan la debatta publica davart in service public actual ed han influenza sin l'orientaziun e la qualitad dals programs da radio e da televisiun e da las ulteriuras purschidas publicisticas a maun da lur gremis ed en il rom da lur cumpetenzas.

    Uniun purtadra

    Statuts da la SSR

  • Tgi è en la radunanza da delegads e tge fa quella?

    Ils statuts da la SSR defineschan las cumpetenzas da la radunanza da delegads. Ultra dals affars statutars, che cumpetan tenor il dretg d'aczias a la radunanza generala, approva la radunanza da delegads sin proposta dal cussegl d'administraziun la tscherna dal directur general, las dumondas dal cussegl d'administraziun davart midaments da la concessiun relevants per la politica da medias ed il rapport annual davart la qualitad ed il service public da la SSR. Ils delegads elegian trais dals nov commembers dal cussegl d'administraziun da la SSR. La radunanza da delegads decretescha il reglament da bunificaziun per sasezza e per il cussegl d'administraziun e po decider davart l'autezza da las taxas da recepziun faschond dumondas al Cussegl federal. Ella definescha, quants daners che stattan a disposiziun annualmain a las societads regiunalas. Ella po però era surdar al cussegl d'administraziun incumbensas d'examinaziun davart il service public e la qualitad: dumondas areguard temas davart la qualitad ed il service public sto il cussegl d'administraziun respunder entaifer sis mais. Ultra da quai prenda la radunanza da delegads enconuschientscha dal reglament d'organisaziun e dals rapports davart la strategia e la realisaziun da la strategia.

    La Svizra tudestga ha 18 delegads, la Svizra romanda nov, la Svizra taliana sis e la Svizra rumantscha trais. Latiers vegnan anc tschintg commembers dal cussegl d'administraziun che n'èn betg delegads en la funcziun dals presidents regiunals. La radunanza generala sa cumpona pia da totalmain 41 persunas. Ella sa raduna almain duas giadas l'onn.

  • Tgi sesa en il cussegl d'administraziun e tge fa quel?

    Il cussegl d'administraziun ha duas rollas: el è la suprastanza da la societad e la direcziun generala da l'interpresa tenor las reglas dal dretg da la societad anonima e las definiziuns en la LRTV ed en la concessiun. El è responsabel visavi il Cussegl federal da cuntanscher las prescripziuns da prestaziuns legalas e giuridic-concessiunalas (guardar era lingia «Incumbensa e dretg»). Il cussegl d'administraziun controlla l'activitad commerziala e prenda decisiuns davart la strategia, il svilup da l'interpresa ed affars impurtants. Il cussegl d'administraziun surdat al directur general resp. a la directura generala la gestiun da la SSR e la responsabladad per ils programs. Tgi che ha tge cumpetenzas, reglescha l'uschenumnà reglament d'organisaziun. Il cussegl d'administraziun da la SSR cumpiglia nov commembers: ils quatter presidents regiunals da SRG.D, RTSR, Corsi e SRG.R, duas persunas elegidas dal Cussegl federal e trais persunas elegidas da la radunanza da delegads. La presidenta resp. il president vegn elegì/ida da la radunanza da delegads.

  • Tge fan il cussegl regiunal, la suprastanza regiunala ed il cussegl dal public?

    La societad SSR sa cumpona da quatter societads regiunalas: SRG.D (Radio- und Fernsehgesellschaft der deutschen und rätoromanischen Schweiz), RTSR (Société de radiodiffusion et de télévison de la Suisse romande), Corsi (Società cooperativa per la Radiotelevisione svizzera di lingua italiana) e SRG.R (SRG SSR Svizra Rumantscha). En tut las societads regiunalas datti ils suandants trais gremis: il cussegl regiunal, la suprastanza regiunala ed il cussegl dal public. Il cussegl regiunal tematisescha ils giavischs socials e culturals da la regiun, prendan enconuschientscha dal rapport da las unitads d'interpresa davart la qualitad, il service public ed ils concepts da programs fan dumondas d'examinaziun a la suprastanza regiunala davart concepts da programs, determineschan ils delegads e surpiglian autras incumbensas.

    Las suprastanzas regiunalas mainan las societads regiunalas e participeschan tenor ils statuts da la SSR als affars dal cussegl d'administraziun da la SSR ch'èn relevants per ils programs. Ellas defineschan ils concepts da programs da l'unitad d'interpresa correspundenta e distribueschan ils daners tranter las spartas da programs (TV), las chadainas da radio e la multimedia, quai però entaifer in rom definì dal cussegl d'administraziun. Mintga suprastanza regiunala po far propostas al cussegl d'administraziun per la tscherna dal directur da las unitads d'interpresa (RSI, RTR, RTS, SRF) e da tscherts commembers da la direcziun generala. Ils presidents da las societads regiunalas appartegnan ex officio a la radunanza da delegads ed al cussegl d'administraziun da la SSR.

    Mintga societad regiunala dispona era d'in cussegl dal public che segirescha il contact stretg tranter ils responsabels da program ed il public da radio e da televisiun e che sustegna la lavur da program cun far constataziuns, propostas ed incitaziuns. En mintga regiun linguistica han ils cussegls dal public organisà in servetsch da mediaziun. Sch'insatgi considerescha p.ex. in'emissiun da televisiun sco betg adequata u cunter la lescha, po el reclamar tar il servetsch da mediaziun. Il servetsch da mediaziun n'ha nagina cumpetenza da relaschar directivas, el vegn però ad empruvar d'intermediar tranter ils realisaturs dal program ed ils aspectaturs malcuntents. Il medem vala per emissiuns da radio e purschidas online. Cunter il giudicat dals servetschs da mediaziun pon ins inoltrar ina procedura da meds legals (q.v.d. che sut tschertas cundiziuns regladas da la LRTV po l'instanza da recurs independenta (UBI), dal Tribunal federal e dal Tribunal europeic dals dretgs uman giuditgar in recurs cunter in'emissiun).

    Funtauna per part:
    Uniun purtadra

  • Tge fan il directur general e la direcziun generala da la SSR?

    Il directur general da la SSR maina l'interpresa. Tge cumpetenzas ch'el ha precis e co che quellas sa distanzieschan da quellas dal cussegl d'administraziun, è reglà en il reglament d'organisaziun. Il directur general è il superiur dals commembers da la direcziun generala, pia dals directurs da RSI, RTR, RTS e SRF, dal directur d'operaziuns e dal directur da finanzas.

    La direcziun generala da la SSR è il gremi operativ il pli aut da la SSR. Ella prepara la strategia da l'interpresa ed è responsabla per la realisaziun. Ella sa fatschenta però era cun ina pluna auters temas, numnadamain cun la purschida (program), il persunal, las finanzas, las immobiglias, la tecnologia ed il dretg. Per ch'ella vegnia a frida cun tut quests temas, sa raduna la direcziun generala var diesch giadas l'onn. Adina preschent è il secretari general da la SSR – era sch'el n'ha nagin dretg da vuschar.

    Sch'i na dat ina giada nagin consens areguard ina tractanda, decida il directur general.

  • Per tge èn ils statuts, il reglament d'organisaziun e l'urden da fatschenta nizzaivels?

    La SSR è ina societad. Per ch'ina societad è reconuschida en Svizra, sto la radunanza constitutiva decretar statuts en scrit. Il dretg da las uniuns è la basa giuridica per mintga societad, quai è definì en il Cudesch civil. Statuts specifics che sa basan sin quel preciseschan, co che la societad è definida, organisada e finanziada. Ils statuts vegnan decretads da la radunanza da delegads ed approvads dal Departament federal per ambient, traffic, energia e communicaziun (Datec).

    Perquai che la SSR n'è però betg mo ina societad, mabain ina societad ch'è organisada tenor ils princips dal dretg da la societad anonima, na datti en la SSR betg mo statuts, mabain er in reglament d'organisaziun. Quel sa basa sin ils statuts e reglescha p.ex. las cumpetenzas tranter il cussegl d'administraziun e la direcziun generala, fa constataziuns precisas davart las incumbensas dals differents gremis e definescha tschertas premissas organisatoricas, sco p.ex. che las decisiuns dals gremis ston vegnir protocolladas en scrit. Il cussegl d'administraziun decretescha il reglament d'organisaziun.

    In'autra ovra directiva relevanta è l'urden da fatschenta. Il reglament d'organisaziun ordinescha ch'il directur general sto decretar in urden da fatschenta. En quel èsi scrit, co che la SSR sto s'organisar entaifer l'interpresa, p.ex. tge cumpetenzas ch'il directur general ha envers ils auters commembers da la direcziun generala u co ch'ins sto organisar las sesidas da la direcziun generala.

    Statuten SRG

  • Tgi èn las societads affiliadas da la SSR?

    • Technology and Production Center Switzerland AG (TPC)
      Dapi l'onn 2000 è la TPC AG ina societad affiliada independenta da la SSR. Ella è responsabla per tut las prestaziuns areguard la realisaziun, la publicaziun e l'administraziun da las producziuns da broadcast e da video da SRF e dapi il 2011 era per la producziun da radio e la cumpetenza dad IT. En pli èn ulteriuras staziuns da televisiun naziunalas e da l'exteriur e l'industria incumbensadras da la TPC AG.
    • SWISS TXT AG
      SWISS TXT producescha cuntegns da teletext per ils chanals da SSR, sviluppescha soluziuns da multimedia per SSR e per terzs e producescha ils suttitels da televisiun e web per persunas cun impediments d'udida e senza udida.

      

    • Telvetia SA
      La Telvetia SA fa part a societads che stattan en relaziun commerziala cun las unitads d'interpresa, p.ex. Mxlab u MCDT.

    Cun excepziun da la TPC AG èn las societads affiliadas responsablas per activitads che na stattan betg directamain en connex cun la producziun da programs da radio e da televisiun u cun autras purschidas publicisticas. I sa tracta da societads betg quotadas. Ellas vegnan manadas tras ina substituziun da la SSR en ils cussegls d'aministraziun correspundents. Ils responsabels vegnan nominads da la direcziun generala da la SSR.

    Funtauna:
    Societads affiliadas

  • Tge ulteriuras participaziuns, cooperaziuns e partenadis ha la SSR?

    Sin las suandantas paginas èn preschentads e declerads tut las participaziuns, cooperaziuns e partenadis da la SSR:

    Structura da l'interpresa

  • Co collavuran las unitads d'interpresa da la SSR?

    La SSR, cun ses lieus en la Svizra tudestga, la Svizra taliana, la Svizra romana e la Svizra rumantscha, è en in barat cuntinuant sin tut ils nivels. Redacziuns, sco p.ex. las redacziuns da las novitads, sa barattan mintga di areguard ils temas e directurs da program sa scuntran regularmain, precis sco ils chauredacturs, ils responsabels per multimedia ed ils schefs da sport. Las regiuns linguisticas èn colliadas er ordaifer il program, p.ex. tar las resursas umanas, la communicaziun da l'interpresa, il dretg, las immobiglias, la distribuziun e la perscrutaziun.