Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

La SSR – in'organisaziun particulara

Cura ch'ins discurra da la SSR, manegian ins en general l'interpresa da medias. Il num SSR stat però per duas furmas entretschadas ina en l'autra: d'ina vart l'interpresa da medias menziunada, da l'autra vart la societad. La finamira da la societad è da manar l'interpresa. Ella sto s'orientar als principis dal dretg da la societad anonima. Per quest motiv ha la SSR er organs sumegliants ad ina societad anonima, per exempel il cussegl d'administraziun u la radunanza da delegads. La societad na po però betg decider libramain tge che l'interpresa po far u tge betg. La societad è obligada da purtar las purschidas publicisticas fixadas en la lescha, pia ils programs da radio e da televisiun e purschidas online. Ella sto resguardar l'incumbensa publica, sco ch'ella è definida en la lescha ed en la concessiun (vesairguardar era lingia «Incumbensa e dretg»).

Organisaturs da radio cun in'incumbensa publica datti en blers pajais dal mund. Lur tratg cuminaivel è ch'els s'orienteschan a l'idea directiva dal service public (vesairguardar «Incumbensa e dretg»).

Lur furmas giuridicas èn però fitg differentas. La Societad Svizra da Radio e Televisiun (SSR) ha ina structura particulara ed unica:

Societad

  • La SSR n'è betg in institut dal dretg public, mabain ina societad che vegn manada tenor ils princips dal dretg da la societad anonima.
  • Questa societad è la purtadra da l'interpresa.
  • La societad consista da quatter societads regiunalas: SRG Deutschschweiz, Société de radiodiffusion et de télévision de la Suisse romande, Società cooperativa per la Radiotelevisione svizzera di lingua italiana (Corsi) e SRG SSR Svizra Rumantscha.
  • La societad ha da procurar che l'incumbensa da prestaziun legala e giuridic-concessiunala vegnia prestada.

La SSR è pia fixada en la societad civila. Ditg auter: la SSR vegn purtada da circa 23 700 commembers.

Interpresa

L'interpresa cumpiglia tschintg unitads d'interpresa – RSI, RTR, RTS, SRF e SWI – e quatter societads affiliadas – Technology and Production Center Switzerland AG (TPC), SWISS TXT AG, Telvetia SA e Mxlab SA. La SSR è la pli gronda interpresa per medias electronicas en Svizra cun 5983 emploiads u 4946 plazzas a temp cumplain, ina svieuta annuala da radund 1,6 milliardas francs e 17 programs da radio, set programs da televisiun ed ina purschida online supplementara. Sco interpresa senza finamira da profit sa finanziescha ella sasezza. Var 75 pertschient acquista ella cun taxas e var 25 pertschient cun activitads commerzialas.