Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

La SSR – la qualitad sco pli aut bain

La qualitad n'è betg sulettamain quai che plascha al public. Gia la concessiun preschenta a la SSR quatter criteris che quella sto ademplir – independentamain dal gust dal public e cuntrari a la concurrenza privata che na vegn betg finanziada tras taxas:

  • l'autenticitad,
  • il senn da responsabladad,
  • la relevanza,
  • la professiunalitad schurnalistica.

Sch'ins discurra da la qualitad publicistica d'emissiuns u da cuntegns da web da la SSR, ston ins adina resguardar trais puncts da vista, numnadamain la perspectiva sociala, la perspectiva interna e la perspectiva dal public. In exempel: cun mintga activitad sto la SSR ademplir l'incumbensa da concessiun resguardond la strategia d'interpresa sociala interna ed a medem temp, sche pussaivel tutgar il gust dal public – in'incumbensa tuttavia pretensiusa.