Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

Qualitad publicistica: pretensiuns, instruments, controllas

  • Tge pretenda la concessiun areguard la qualitad publicistica da la SSR?

    Artitgel 3 da la concessiun da la SSR descriva las pretensiuns da qualitad publicisticas a la SSR:

    • La lavur da program da la SSR sto ademplir autas pretensiuns qualitativas ed eticas.
      Las medias han pussanza. Ellas pon influenzar la furmaziun da l'opiniun, destruir carrieras u stgaffir stars. Da collavuraturs da medias vegn spetgà ch'els tractan questa pussanza cun responsabladad. En spezial vala quai per la SSR sco interpresa cun incumbensa publica. I na tanscha pia betg, sche las redacziuns da la SSR sa tegnan vi da las leschas. Ellas ston era respectar fermamain normas etic-professiunalas (vesairguardar sutvart). 
    • Ils differents secturs da programs s'orienteschan a l'incumbensa da program. 
      L'incumbensa da program vegn medemamain descritta en la concessiun. Ella cumpiglia ils aspects promoziun dal spiert da cuminanza en Svizra, integraziun, promoziun da la lavur culturala svizra, divertiment, furmaziun e promoziun da la furmaziun libra d'opiniun (vesair lingia «Incumbensa e dretg»). 
    • Ils singuls secturs da program ston sa distinguer tras autenticitad, senn da responsabladad, relevanza e professiunalitad schurnalistica.
      Quests quatter criteris furman pia la basa per ils «standards minimals da qualitad da program» (guardar sutvart).
    • La SSR procura che ses programs sajan incumparabels e sa distinguan uschia d'organisaturs che sa drizzan al commerzi.
      La SSR na dastga betg simplamain copiar l'entir concept da purschida d'ina chasa da medias commerziala. La SSR sto sa differenziar dals privats quai che pertutga la purschida ed il cuntegn. 
    • La SSR ha en egl ina gronda acceptanza tar ils differents publics en mira.
      La SSR sto far stim d'avair purschidas per differentas gruppas en mira. Ella na dastga per exempel betg decider da producir mo pli cuntegns per uffants.
    • La SSR na mesira sia acceptanza en emprima lingia betg a maun da quotas da participaziun al martgà.
      Betg mo il dumber d'aspectaturs, auditurs ed utilisaders d'internet decida, sche la SSR fa endretg sia lavur u betg. La SSR sto tenor incumbensa da program era porscher cuntegns davart la cultura svizra, l'integraziun u la furmaziun. Tenor l'experientscha èn cuntegns davart quests temas betg propi in hit. Era sch'els carmalan mo in pitschen public èn els impurtants per giuditgar la qualitad dal program.
    • Per ademplir las pretensiuns numnadas definescha la SSR standards da qualitad dal cuntegn e da la furma ch'ella publitgescha era.
      La SSR posseda standards correspundents: ils «standards minimals da qualitad da program» (guardar sutvart).
    • La SSR organisescha regularmain controllas da qualitad internas.
      Las controllas vegnan organisadas en las unitads d'interpresa RSI, RTR, RTS, SRF e SWI. Mintga unitad d'interpresa ha sviluppà sia atgna metoda.
    • La SSR infurmescha la publicitad davart ils resultats da las controllas da qualitad.
      En il rapport da gestiun da la SSR vegn infurmà mintg'onn davart las bregias en connex cun la qualitad publicistica.

    Konzession SRG SSR

  • Tgi surveglia la qualitad publicistica da la SSR?

    Quatter acturs surveglian la qualitad publicistica da la SSR:

    1. La SSR sezza. RSI, RTR, RTS, SRF e SWI organiseschan regularmain controllas da qualitad. Davart ils resultats infurmescha ella mintg'onn en il rapport da gestiun. Controllas da qualitad èn dentant er ina part da la lavur da mintgadi entaifer las redacziuns e partiziuns. Uschia fan ins per exempel sistematicamain conferenzas da concept u sesidas da feedback.  

    2. Ils cussegls dal public. En mintga regiun linguistica ed era tar la SWI datti davart da la purtadra SSR in cussegl dal public. Quel controllescha la qualitad da las purschidas da las unitads d'interpresa e discutescha regularmain cun las persunas che fan il program.

    3. L'Uffizi federal da communicaziun (Ufcom) sco autoritad da surveglianza. El incumbensescha instituziuns da perscrutaziun d'analisar en furma da provas da controlla la purschida da la SSR. Las analisas duain mussar, sche las emissiuns e las purschidas online tegnan quint avunda dals aspects da l'incumbensa da program (promoziun dal spiert da cuminanza en Svizra, integraziun, promoziun da la lavur culturala svizra, divertiment, furmaziun e promoziun da la furmaziun libra d'opiniun).

    4. Il public. El po intervegnir tar il servetsch da mediaziun ed eventualmain era tar l'instanza da recurs independenta (UBI), sch'el remartga ina prestaziun fallada da redacziun en in'emissiun u in cuntegn da web.

    Qualitad SSR

    Bakom – Beiträge und Studien Medienforschung

  • Tge èn ils «standards minimals da qualitad da program»?

    Ils standards minimals da qualitad da program valan per tut las unitads d'interpresa da la SSR. I sa tracta da sis elements constitutivs che cumpiglian instrucziuns d'agir concretas per las redacziuns. Sche las prescripziuns vegnan realisadas, duessan collavuraturs da medias posseder tut ils instruments per tegnair sin in aut nivel ils criteris da qualitad pretendids da la concessiun «professiunalitad schurnalistica» e «senn da responsabladad». Quai è da l'autra vart la basa per «autenticitad» e «relevanza» en tut ils secturs dal program. Ils suandants sis elements constitutivs furman ils standards minimals da qualitad da program: 

    • standards da qualitad e normas
    • manar cun finamiras MbO e mandat da spediziun
    • resursas e process
    • feedback e controlla da qualitad
    • scolaziun
    • perscrutaziun dal martgà e dal public

    Minimalstandards Programmqualität SRG

    Die sechs Bausteine der Programmqualität

  • Tge è il code d'etica da la SSR?

    Tut las interpresas pli grondas possedan in code d'etica u in codex da cumportament. Ellas pon formular directivas curtas e cleras fin a collecziuns da reglas da fin a 50 paginas cun reglas da cumportament e sancziuns detagliadas. La SSR è sa decidida per in code d'etica simpel. Il code d'etica fixescha la tenuta etica da la SSR en quatter princips. El vala per tut las collavuraturas e tut ils collavuraturs da la SSR. El n'è ni in'instrucziun per in cumportament etic ni ina collecziun da scumonds, mabain formulescha princips da cumportament impurtants e furma uschia la basa per mesiras concretas sco per exempel per l'introducziun d'in post per whistleblowing il 2013, al qual ins po annunziar confidenzialmain surpassaments da reglas.

    Code etica SSR

  • Tge è la charta da program da la SSR?

    La charta da program serva als collavuraturs da las medias da la SSR sco directiva per lur lavur. Ella pretenda sin plaun constituziunal publicistic intern las valurs che vegnan formuladas pli concretamain per la lavur quotidiana en las directivas publicisticas da las unitads d'interpresa. Las directivas publicisticas da l'unitad d'interpresa derivan pia da las valurs generalas publicisticas da la charta da program.

    Charta da program

  • Tge èn las lingias directivas da la SSR?

    Ultra da codes d'etica datti en las bleras interpresas pli grondas lingias directivas. Las lingias directivas inditgeschan la direcziun a l'interpresa. Ellas descrivan tge visiun ch'è la basa da l'interpresa e tge missiun che duai vegnir ademplida communablamain. Vers anora mussan las lingias directivas la tenuta da l'interpresa. Las lingias directivas mussan la politica d'interpresa e la strategia. Ultra da la missiun e la visiun menziunan las lingias directivas da la SSR maximas centralas: autenticitad, independenza, varietad, creativitad e fairness.

    Maletg directiv

  • Code d'etica, lingias directivas, charta da program: tge è la differenza?

    Ensemen cun il reglament d'organisaziun furman il code d'etica, las lingias directivas e la charta da program per uschè dir il plaun constituziunal da la SSR. Las quatter ovras directivas valan per l'entira SSR sin nivel suprem ed il cussegl d'administraziun las approvescha. Ma tge è la differenza tranter las quatter ovras directivas?

    Tranter il reglament d'organisaziun e las trais autras ovras directivas datti ina clera differenza: il reglament d'organisaziun cuntegna prescripziuns organisatoricas. Il code d'etica, las lingias directivas e la charta da program cuntegnan directivas da cumportament e mussan las valurs che la SSR represchenta. Il code d'etica è in codex general da cumportament che las bleras interpresas pli grondas possedan. Las lingias directivas descrivan la visiun che la SSR ha en mira, tge missiun ch'ella intenziunescha d'ademplir cun ses collavuraturs e tge valurs ch'èn da tegnair ad aut. Las lingias directivas èn pia formuladas specificamain per la chasa da medias SSR e sia purschida. La politica e las strategias da la SSR derivan da las lingias directivas (guardar lingia «Strategia e finamiras»). La charta da program ha concretamain en mira ils cuntegns publicistics. Ella deriva da la concessiun, dad autras ovras directivas legalas (p.ex. dal dretg penal u da la protecziun da la persuna) sco era da prescripziuns da l'etica da medias ed ideas generalas e duai servir a collavuraturs da las medias sco mussavia da cumportament.

  • Prescripziuns da l'etica da medias – nua chatt'ins quellas?

    «Las obligaziuns ed ils dretgs da schurnalistas e schurnalists» ch'il Cussegl svizzer da la pressa ha decretà furman la directiva da l'etica da medias per collavuraturs da las medias en Svizra. Il Cussegl svizzer da la pressa stat a disposiziun al public ed als collavuraturs da medias sco instanza da recurs per dumondas da l'etica da medias. Cun sia activitad contribuescha el a la reflexiun davart problems generals da l'etica da medias e dat uschia impuls per discussiuns en las redacziuns da las interpresas da medias svizras. Il Cussegl svizzer da la pressa prenda posiziun sin recurs u ord agen interess en connex cun dumondas da l'etica professiunala dals collavuraturs da medias. El defenda la libertad da la pressa e la libertad d'exprimer l'opiniun. La basa per la posiziun dal Cussegl svizzer da la pressa furman sper la «Decleraziun da las obligaziuns e dals dretgs da schurnalistas e schurnalists» las directivas respectivas dal cussegl da pressa e sia pratica. Il cussegl da pressa menziuna en sia posiziun, sch'il codex schurnalistic è vegnì surpassà u betg.

    Presserat

  • Tge capita, sche cuntegns incorrects vegnan publitgads?

    La charta da program da la SSR pretenda che collavuraturs da la SSR concedan avertamain sbagls e che infurmaziuns falladas vegnian curregidas. En cas ch'insatgi pensa d'avair percurschì in sbagl che n'è tenor las persunas responsablas da la redacziun nagin sbagl, po quel sa drizzar al servetsch da mediaziun dals gremis purtaders che emprova d'intermediar tranter las persunas che recloman e las redacziuns. La proxima instanza è l'Autoritad independenta da recurs davart radio e televisiun (AIRR). Cunter ina decisiun da l'AIRR po tant la persuna che ha reclamà sco era la SSR far recurs tar il Tribunal federal (detagls sut «Dretg ed incumbensa», staziun 3).

    Posts da mediaziun

    Unabhängige Beschwerdeinstanz (UBI)