Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

Atgnas finamiras ed agens princips

  • Tge èn las lingias directivas da la SSR?

    En las bleras interpresas pli grondas datti lingias directivas. Las lingias directivas inditgeschan la direcziun a l'interpresa. Ellas descrivan tge visiun ch'è la basa da l'interpresa e tge missiun che duai vegnir ademplida communablamain. Vers anora mussan las lingias directivas la tenuta da l'interpresa. Las lingias directivas mussan la politica d'interpresa e la strategia. Ultra da la missiun e la visiun menziunan las lingias directivas da la SSR maximas centralas: autenticitad, independenza, varietad, creativitad e fairness. 

    Maletg directiv

  • Tge finamira vul la SSR cuntanscher cun sia strategia d'interpresa?

    La strategia d'interpresa resguarda tut ils secturs externs (purschida e martgà, incumbensa) ed interns (process, finanzas, persunal) da l'interpresa. Ella dat la direcziun per il svilup da la SSR. Dad ella derivan las strategias parzialas da las unitads d'interpresa (RSI, RTR, RTS, SRF, SWI), dals secturs spezials (p.ex. operaziuns, finanzas) e da las societads affiliadas (Technology and Production Center Switzerland AG, SWISS TXT AG, Telvetia SA e Mxlab AG). Las prescripziuns strategicas en connex cun la purschida dattan il rom per il svilup da la purschida linguistic-regiunala u surregiunala da la SSR. Da quella furman ils responsabels da program e da producziun ils puncts centrals per lur secturs.

    Strategia d'interpresa SRG SSR

  • Tge finamiras cumpiglia la strategia d'interpresa actuala da la SSR?

    La strategia d'interpresa mussa a la SSR la via ad ina chasa da multimedia digitala. La SSR vul cuntegns per tut las furmas decisivas d'utilisaziun da las medias e tut las plattafurmas funcziunalas. Ella s'orientescha vi da la plivalur per las utilisadras ed ils utilisaders e fa sias purschidas là, nua che quels sa chattan. Concret vul quai dir che la SSR

    • cumplettescha la purschida per il public mobil, giuven ed urban e per persunas cun ina biografia da migraziun;
    • intensivescha il contact cun las utilisadras ed ils utilisaders da las medias, cunzunt en las raits socialas. La SSR utilisescha online e HbbTV per interagir cun il public;
    • tgira in schurnalissem independent e malcumadaivel cun ina professiunalitad che metta standards;
    • aspirescha a cooperaziuns regiunalas, naziunalas ed internaziunalas; 
    • surpiglia la responsabladad per la plazza da medias, per l'economia publica e per ina societad persistenta; 
    • pratitgescha l'innovaziun ed augmenta l'agilitad; 
    • promova ina cultura d'interpresa digitala.

    Strategia d'interpresa SRG SSR