Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

La strategia d'interpresa – in cumpass fidà

Cun l'impurtanza pli e pli gronda da l'internet è il sectur da medias exponì a grondas midadas. La strategia d'interpresa da la SSR garantescha che tut las unitads d'interpresa da la SSR han las medemas finamiras principalas e che tut ils collavuraturs èn orientads davart questas finamiras.

Models da fatschenta tradiziunals ch'èn vegnids creads e testads durant tschientaners, na funcziunan betg pli sco fin uss e vegnan adattads. La concurrenza n'è betg pli locala, mabain globala e deriva da firmas d'ordaifer la branscha. Oz èn p.ex. era gigants globals sco Google, Apple u Amazon activs en la fatschenta da medias. Uschia sa mida l'ambient da la SSR spert e per part a moda radicala.

  • Las cundiziuns politicas e regulatoricas che mettan cunfins a la SSR èn dispitaivlas dapi onns. Ultra da tendenzas da schluccar datti era vuschs che vulan restrenscher pli fitg la SSR.
  • Ciclus da products e d'innovaziuns per apparats finals, sco per exempel smartphones u televisiuns e per l'infrastructura mediala vegnan pli e pli curts. Novas firmas cun purschidas innovativas da la tecnica e dal cuntegn vegnan al martgà ch'è gia fragmentà fermamain e procuran per anc dapli concurrenza.
  • Era la populaziun svizra sco gruppa en mira sa mida – tranter auter sia cumposiziun sociala e demografica. La populaziun vegn per exempel adina pli veglia ed adina dapli glieud va a viver en la citad.
  • Novas pussaivladads tecnicas midan il cumportament dal diever da medias: empè da sa drizzar sco fin ussa suenter il program ed il temp d'emissiun, pussibiliteschan innovaziuns che sa basan sin l'internet in access individualisà ed independent dal temp a las purschidas da medias. Ils temps che la famiglia sa radunava la saira a las 19.30 enturn la televisiun per guardar «Tagesschau» èn daditg passads. Oz tscherna mintgin las emissiuns e las contribuziuns che plaschan e guarda, taidla u legia ellas da tut temp.

La SSR è sa midada da la «chasa da radio e televisiun» da pli baud ad ina chasa da medias. Tant pli impurtanta è in'orientaziun segira: internamain definescha la strategia d'interpresa da la SSR las pli impurtantas sfidas dals proxims onns e metta prioritads cun las finamiras d'interpresa.

Extern èn la Lescha federala davart radio e televisiun (LRTV) e la concessiun da la SSR ils mussavias ils pli impurtants.

Per pudair surviver en quests temps turbulents dovri in cumpass che mussa la direcziun e gida da tegnair il curs. La chasa da medias SSR sto persvader en il nov ambient sco purschidra da radio e televisiun (broadcast) e da multimedia (broadband). Quest cumpass è la strategia d'interpresa.