Explorar la SRG SSR cun «Metro»

«Metro» maina da staziun a staziun als temas interessants ed impurtants da savair en e davart la Societad svizra da radio e televisiun SRG SSR. Ins vegn a savair, pertge che la SSR ha bain in'incumbensa publica e n'è tuttina nagin institut dal dretg public. Ins emprenda ad enconuscher la furma d'organisaziun unica da la SSR e vesa tge finamiras che la SSR ha en l'avegnir. «Metro» è in instrument per persunas che han gugent infurmaziuns spertas, ma era per quellas che vulan savair insatge pli precis. «Metro» s'adressescha a novs collavuraturs, ma era «veglias vulps» pon anc scuvrir l'ina u l'autra chaussa davart la SSR. Era persunas che na lavuran betg tar la SSR, èn natiralmain envidadas cordialmain d'emprender ad enconuscher meglier la SSR a maun da «Metro». L'emprima staziun da mintga lingia infurmescha cun in pled davart ils pli impurtants fatgs. La segunda staziun sa profunda gia pli fitg en in tema. En la staziun trais chatt'ins infurmaziuns detagliadas e tgi che clicca sin la quarta staziun arriva a las unitads d'interpresa Radiotelevisione svizzera (RSI), Radiotelevisiun Svizra Rumantscha (RTR), Radio Télévision Suisse (RTS), Schweizer Radio und Fernsehen (SRF) e swissinfo (SWI).

La strategia e la finamira da RSI, RTR, RTS, SRF e SWI

Radiotelevisione svizzera (RSI)

RSI è l'unitad d'interpresa da la SSR en la Svizra taliana. 1155 collavuraturs (1039 postas cumplainas) produceschan cuntegns per trais programs da radio, dus programs da televisiun e diversas purschidas da multimedia.

  • Publicaziun incumbensa service public

    La publicaziun davart l'incumbensa da service public vul preschentar l'interpresa multifara e cumplexa RSI curt e bain, dar ina survista dals studios e programs, dals biros e las partiziuns, preschentar a moda simpla ed attractiva las structuras entretschadas e mussar co che la lavur da RSI ha effect sin l'economia, la societad e la cultura.

    RSI Missione servizio pubblico

Radiotelevisiun Svizra Rumantscha (RTR)

RTR è in'unitad d'interpresa da la SSR cun il studio principal a Cuira. En 131 plazzas cumplainas lavuran 167 persunas en tut la Svizra rumantscha per noss public.

  • Mussavia RTR

    En il process da la midada vi en il mund digital interprenda RTR tut ils pass necessaris per garantir er en il futur ina purschida da tuns, maletgs e texts al public rumantsch. Tge direcziun che RTR vul prender, pon ins leger en il Mussavia RTR ed en la Planisaziun RTR.

    Incumbensa e strategia

Radio Télévision Suisse (RTS)

RTS porscha cuntegns via quatter programs da radio, dus programs da televisiun e pliras plattafurmas interactivas. RTS sa drizza al public francofon en Svizra e sur TV5Monde ed il web a persunas da lingua franzosa a l'exteriur. Cun  1872 plazzas da lavur (1568 plazzas cumplainas) è l'interpresa domiciliada a Genevra e Losanna in dals leaders sin il martgà en la domena audiovisuala.

  • La strategia da RTS

    La strategia preschenta las valurs da la RTS, med audiovisual svizzer dal service public ed actura da la diversitad romanda ch'è averta al mund. Ella descriva las finamiras che la RTS vul realisar ils proxims onns en las domenas da la producziun radio-televisiun-multimedia e da la direcziun da l'interpresa.

    Stratégie RTS 2017–2018

Schweizer Radio und Fernsehen (SRF)

SRF cun il studio principal a Turitg Leutschenbach è la pli gronda unitad d'interpresa da la SSR. Cun ulteriurs studios principals a Basilea, Berna, e Turitg Brunnenhof e studios regiunals ad Aarau, Cuira, Lucerna e Son Gagl è SRF represchentà bain en la Svizra tudestga. Circa 2110 collavuraturas e collavuraturs (1620 plazzas cumplainas) lavuran tar SRF.

  • Incumbensa e strategia da SRF

    Il chapitel Incumbensa e strategia sin srf.ch cuntegna las Valurs e direcziuns d'acziun strategicas da SRF fixadas da la direcziun sco datoteca pdf.

    Auftrag und Strategie SRF

swissinfo.ch (SWI)

SWI ademplescha dapi passa diesch onns l'incumbensa d'infurmaziun a l'exteriur dada da la Confederaziun e cumplettescha uschia ina purschida online da las staziuns da radio e televisiun da la SSR. Il servetsch internaziunal da la SSR sa drizza oz en emprima lingia ad in public interessà per la Svizra sco er a las Svizras ed als Svizzers a l'exteriur. Dapi il 2013 rapporta SWI er en russ – ultra d'englais, tudestg, franzos, talian, spagnol, portugais, chinais, arab e giapunais – e cuntanscha uschia passa 80% dals utilisaders da l'internet en tut il mund. SWI ha ina sedia a Berna (sez principal), a Genevra ed a Turitg. Ulteriuras plazzas da lavur sa chattan en il center da medias da la Chasa federala.